რა ხდის გუნდს წარმატებულს? Google-ის „პროექტ არისტოტელეს“ გაკვეთილები

კომპანიის წარმატება რომ გუნდების წარმატებაზეა დამოკიდებული, ეს უკვე დიდი ხანია ცნობილია და ბიზნესის ერთ-ერთი მთავარი საზრუნავია, მაგრამ რაზეა დამოკიდებული თავად გუნდების წარმატება? რა ქმნის ისეთ გუნდს, რომელიც საოცნებო შედეგებს დებს?

მიუხედავად იმისა, რომ ყველას გვაქვს ჩვენი პასუხები — წაკითხული, მოსმენილი, გამოცდილებით აღმოჩენილი — საინტერესოა, რას გვიჩვენებს Google-ის მიერ ჩატარებული მასშტაბური კვლევა, რომელიც 180 გუნდის მონაწილეობით „პროექტ არისტოტელეს“ ფარგლებში განხორციელდა. სახელწოდებაც არისტოტელეს ფრაზიდან მოდის: „მთლიანი უფრო მეტია, ვიდრე მისი ცალკეული ნაწილების ჯამი.“

კვლევის მთავარი კითხვა იყო: რატომ არის ზოგიერთი გუნდი ბევრად უფრო შედეგიანი, ინოვაციური და პროდუქტიული, ვიდრე სხვა? რა ფაქტორები განსაზღვრავენ გუნდში თანამშრომლობის წარმატებას? და რა უნდა გააკეთოს ორგანიზაციამ, რომ გუნდები უფრო ეფექტიანები გახდნენ?

მოცემული კვლევის მთავარი აღმოჩენაა, რომ გუნდის შედეგიანობაზე ნაკლებად მოქმედებს თუ ვინ არის გუნდში და უფრო მნიშვნელოვანია თუ როგორ მუშაობენ ისინი ერთად, და ეს შედეგები მხოლოდ Google-ს არ ეხება – სხვა ორგანიზაციებშიც რეპლიკაციისას იგივე მიგნებები დადასტურდა.
აი ის ხუთი მთავარი ფაქტორი, რომლებიც ყველაზე დიდ გავლენას ახდენს გუნდურ ეფექტიანობაზე:

• ფსიქოლოგიური უსაფრთხოება – სადაც ადამიანები გრძნობენ თავს უსაფრთხოდ, რომ გამოთქვან აზრი, დასვან „სულელური“ კითხვები, ითანამშრომლონ და აღიარონ შეცდომა, ისე რომ არ ელიან დამცირებას ან დასჯას.
• სანდოობა, ურთიერთდამოკიდებულება – როცა ყველა დროულად და ხარისხიანად აკეთებს თავის საქმეს და სხვას არ შეატოვებს პასუხისმგებლობას.
• სტრუქტურა და სიცხადე – ყველას ესმის რა უნდა გააკეთოს, რა არის მიზანი და როგორ გაიზომება შედეგი.
• სამუშაოს მნიშვნელობა, სარგებელი – რომელიც თითოეულისთვის შეიძლება განსხვავდებოდეს: შემოსავალი, ოჯახის მხარდაჭერა, გუნდის წარმატება, თვითგამოხატვა…
• ზეგავლენა – როცა თანამშრომელი ხედავს, რომ მისი შრომა რეალურ შედეგს იძლევა და ორგანიზაციის წარმატებაში საკუთარი წვლილი შეაქვს.

კვლევამ ასევე აჩვენა, რომ ზოგიერთი ფაქტორი, რომელიც ბევრს „გუნდურობისთვის კრიტიკულად“ მიაჩნდა, სინამდვილეში მნიშვნელოვან გავლენას არ ახდენს. მაგალითად: ოფისში ერთად ყოფნა, მხოლოდ კონსენსუსზე დაფუძნებული გადაწყვეტილებების მიღება, პიროვენული მახასიათებლები – ექსტროვერსია, ინტროვერსია, ინდივიდუალური შედეგები, სამუშაოს მოცულობა, სტაჟი, თანამდებობა, ან გუნდის ზომა . . .

„პროექტ არისტოტელეს“ მთავარი გაკვეთილია, რომ ეფექტიანი გუნდის საიდუმლო არც ცალკეულ „ვარსკვლავ თანამშრომლებშია“ და არც ხანგრძლივ სტაჟში. წარმატებული გუნდი იქმნება მაშინ, როცა ადამიანები ერთმანეთთან მუშაობენ ისეთ გარემოში, სადაც უსაფრთხოა აზრის გამოთქმა, ნათელია მიზნები და ყველას აქვს განცდა, რომ მისი წვლილი ნამდვილად მნიშვნელოვანია.

აქვე გთავაზობთ Google-ის მიერ შემუშავებულ „გუნდური მუშაობის შეფასებისა და დისკუსიის გზამკვლევს“, რომელიც დაგეხმარებათ შეაფასოთ თქვენი გუნდის ეფექტიანობა და ამ საკითხს მეტად ჩაუღრმავდეთ თანაგუნდელებთან ერთად.